Senin, 21 Maret 2011

Cerita bersambung; SI BUTONG


SI BUTONG
Di sada huta adong ma sahalak doli-doli na margoar si Butong. Si Butong on jolma na losok do jala holan na mangan ma nian karejona. Ai so porlu di ibana na mula-ulaon. Natorasna pe dang nah ea diurupi mangula. Ido sai holan na dimuruhi natorasna ibana.
Alani arsak ni natorasna tu si Butong, diusirma ibana sian jabuna. “Molo sai songonon do karejom, ba lao maho sian jabu on. Tumagon ma ho dang huida, ai nunga pusing hami mamikkiri ho,” ninna inang na. Jala dang hea be di lehon ibana mangan.
Mambegei, sian naso binoto ni natorasna, laho ma si Butong sian huta I, ala naso di pardulihon natorasna be ibana. Di pinjam ma hepeng sian hombar jabuna asa adong na laho ongkos na. “Namboru, hupinjam jolo hepeng munai Rp100 ribu, asa laho au mangaranto anon dibayar natorashu pe ai na disuru do ahu,” ninna ibana. Burju do roha ni namboru nai, dilehon ma hepeng i. “Mauliate da namboru, pintor di paulak inangku pe anon,” ninna ibana.
Dungi borhat ma ibana, alai di pardalanan sai marpikkiri ma ibana tudia do haporusanna. Tarborsik ma tu pikkiranna,”Ohh, tu Jakarta na ma au. Adong do dongan ku si Balian di Jakarta,” ninna rohana.
Ala dihilala rohana hepengna dang sae, di tompang ibana ma sada truk barang na tu Jakarta. Ai molo mar-bis dang sae hepengna. “Lae, dohot jolo au manumpang tu Jakarta,”ninna ibana. “Ngeri do lae na mar-truk on, ia mar-bis ma hamu lae,” ninna supir ni truk i. “Ai na so adong do lae hepeng hu, tolong ma jolo lae sian truk muna on ma ahu,” ninna alusna. “Molo sabar do hamu lae, ba beta hamu ma,” ninna supir i.
Dung lima ari di pardalanan, sahat ma nasida tu Jakarta. Turun ma si Butong di Tanjung Priok. “Dison ma hamu lae, nunga Jakarta on, Tanjung Priok do goar na,” ninna supir i.
Dungi tuat ma ibana huhut mardongan lomos ni roha, ai so diboto ibana tudia jala ise si dapothonon na. Laho ma ibana tu sada warung, disi ma ibana minum kopi huhut marpikkiri tu dia do tujuanna. Sian na so panagamanna di bege ibana ma adong dua halak na di warungi marhata batak, songon na las ma rohana. “Santabi jo lae, ia ahu margoar si Butong. Ondope au ro sian hitaan, dang adong na hutanda di Jakarta on. Tolong hamu ma jolo ahu lae asa rap dohot hamu,” ninna si Butong. Marsiberengan ma na dua I, alai didok ma,”boi do Iae, beta hamu ma di jabu ma hita manghata-hatai dohot martarombo,” ninna  nasida nadua. Laos di garar si Butong ma kopi ni halak I huhut mandok mauliate godang. Ai dang be mampar ibana didok rohana.
Tung di oloi nasibna do, dung hira-hira sabulan si Butong rap dohot dongan nai, dapot karejo ma ibana makkenehi metro mini. Di tingki na makkenehi metro mini I di pakke ibana do partingkianna laho marsiajar mamboan mobil manang manupiri. Ala di boto ibana do songon dia maol ni na mangalului hepeng i, sai di usahahon ibana do manisihon sasaotik hepeng nai.”Simpanon ku do deba asa adong anon mambahen SIM-hu, atik beha anon adong namarasi roha di bahen iba gabe supirna,” angan-angan na.  Muba do antong parrohaonna, tingki di huta si losok do ibana.
Dang sadia leleng nari, di sada tingki, toho do antong angan-angan nai. Di togihon sada halak namora ma do ibana gabe supir pribadina. Ai pengusaha na balga do amantai. "Olo do ho puang gabe supir hu, supir pribadi?" ninna amanta i manungkun. "Nauli Amang," ninna alusna. Dungi pintor hatop ma ibana laho mangurus bisoloit (SIM) na.
Hira-hira dung tolu bulan si Butong karejo di Amanta namora i, adong ma dipapungu ibana sihumisikna. Asing sian gaji na, dapot dope si Butong hepeng parmangan ganup ari. Sipata do dilehon Amanta namora i songon surung-surung tu ibana ala dibereng do si Butong burju karejo, jala tung mansai manat-manat do ibana mamboan mobil. Holong ma tahe roha ni namora i mamereng si Butong. Aut sugari ra adong boru ni namora i patongonon na do ra tu si Butong di tingki i.
Nunga hira-hira tolu taon si Butong mangaranto, dang na hea dope paboa barita ibana tu natorasna.  Dirohana, ingkon do jolo hasea ibana ipe asa marbarita tu natorasna. Hape sian naso binotona, sai lulu do natorasna. Molo adong ro parhutana sian pangarantoan, sai pintor di sukkun do. "Ai pajumpang do ho dohot anakku si Butong?" Sude ma tahe di sungkun angka naro sian pangarantoan. Goarna pe Jakarta, ianggo so binoto alamatna maol do luluan. Huroha laos so margorak do tu si Butong nasai dilulu-lului inang nai  ibana.
Dinasahali adong ma sahalak doli-doli pajumpang dohot si Butong. Ia doli-doli i dongan sahutana do sian bona pasogit. Ninna mandok,"Appara, ia ahu na baru mulak pe sian huta. Pajumpang do ahu dohot natorasmu. Disukkun do ahu taringot tu ho. Alai hudokma naso hea dope hita pajumpang. Hatop do dialusi si Butong," Boha sehat do bapa dohot inongku, poang?" "Sehat do halaki sude," ninna doli-doli i mangalusi. "Alai poang adong do tona ni natorasmu tu ho, "Molo pajumpang ho dohot apparam si Butong, asa dokkon jo ibana mangoli, unang jolo matua." "Olo inangtua, bapatua, molo pajumpang ahu hupasahat pe," ninna doli-doli i mangalusi natorasna i.
Sai marpikkiri do si Butong hata ni natorasna i. Sipata do ro tupikkiranna, "ah tahe, nunga matua natorashu, molo mangoli ahu las ma ra nang rohana." Alai olo do muse balik pikkiranna,"Aha ma behononku allangon ni i, sian diama hepengku tu si sude? Ai so sadia do pe na husari." Ibana manukkun, jala laos ibana muse do na mangalusi.
Na malo do ianggo si Butong margitar, molo dung bot ari, jot-jot do ibana marende huhut margitar di jolo ni jabuna i rap dohot angka na asing. Godang do ragam ni ende di boto ibana, dang holan ende batak. Molo margitar ibana, sai rodo angka hombarna, sipata rap marende nasida. Disi ma tio ni suara dohot pamiltik ni gitar i mambahen angka na deba tarhatotong mambege si Butong marende.
Alani parendeon dohot pamiltik ni gitar nai, gabe godang ma angka naposo mananda ibana, tarlumobi ma angka anak boru.Boru ni halak ion pe godang ma na gabe lomo rohana.
Alai sada sian angka anak boru ni halak ion i mansai uli, alai di mulana dang adong roha na asing di si Butong, holan dongan sambing do. Hape dung jot-jot diida ibana jala sai olo itoani marende rap dohot ibana, gabe lomo ma rohana. Mardomu muse, molo dibandingkon tu angka na asing tarummuli do on, dohot do lambok ni hatana begeon.
"Ahh, nauli ma itoanon, boha do ate molo hudok hatakku," sai manginongi dirohana. Alai sipata marpikkir ibana beha muse annon namasa molo gabe parumaen ni dainang.
Dung tolu bulan sai dipikkiri si Butong, dipatulus ma rohana na itoani pillitonna. "aha pe namasa, dohononku nama hatakku tu itoani, mardomu sotung gabe panglatu (panglima lajang tua) iba annon," ninna dirohana.
Disada tikki dung mulak si Butong sian karejona, dipiltik ma gitarna huhut marende. Umbege soara nisi Butong, pintor ro antong itoan i.Didongani ma ibana marende.(marsambung)

Tidak ada komentar:

Poskan Komentar